أكد الفنان إيهاب فهمى رئيس البيت الفني للمسرح، أن هناك العديد من الرؤى التي تم طرحها في منتدى مصر سيتم تنفيذها على أرض الواقع، خاصة فيما يتعلق بتثقيف البسطاء وتقديم عروضا مسرحية تعبر عنهم في مختلف أنحاء الجمهورية.
وقال الفنان إيهاب فهمى في مداخلة هاتفية لتليفزيون اليوم السابع: "إحنا هنقدم، بالاتفاق وبتوجيهات معالي الوزير، وبالاتفاق مع زميلي الدكتور أيمن الشيوي، رئيس قطاع المسرح، والأستاذ محمد الشرقاوي، اللي بيعمل في مسرح المواجهة والتجوال، عروض مسرحية بتقدم ما تم طرحه أو طلبه فى منتدى مصر.. وبالفعل فيه خطة قائمة وجارٍ تنفيذها، وأخدنا موافقة معالي الوزير ضمنيا، وإن شاء الله هنشرع في تنفيذها فورا بعد انتهاء المنتدى".
وأضاف فهمى لتليفزيون اليوم السابع قائلا: "بمعنى إننا بنقول هنقدم أنيميشن، وهنقدم عرائس، ومسرح عرائس ومسرح أطفال، عشان نقول بكرة والنهارده والأمس كان فيهم إيه، والحلول إيه، ومصر مستقبلها إيه.. هنعمل عروض تخاطب العمق المصري في كل مكان، تنفيذا لكل توصيات منتدى مصر، إن شاء الله، والعروض توصل بالتوصيات دى للناس".
وتابع فهمى حديثه قائلا: "ده أهم هدف عندنا دلوقتى، إن الناس تعرف فى كل حتة في الوطن، وإن المنتج الثقافي المسرحي يوصل لها، ويعبر عما بداخل الوطن وما يريده، وده بعيدا عن العروض اللي بنقدمها في كل مسارحنا، وبعيدا عن الافتتاحات العظيمة اللي هتتم في مسارحنا، زى مسرح مصر، وكل العروض اللي بتتم في الموسم الشتوى اللى بدأ عندنا بقوة شديدة جدا، وافتتاح عروض متميزة جدا".
وأضاف فهمى: "إن شاء الله، ده دور من الأدوار اللي عندنا الفترة القادمة، في مشروع مسرح المواجهة والتجوال، من خلال عروض مسرحية ومسرح عرائس ومسرح أطفال، بتعبر عن توصيات منتدى مصر أو توثقها.. مسرح المواجهة والتجوال أساسه قائم على كده، إنه بيروح للناس، هتلاقينا في أبو رماد وشلاتين وأسوان والأقصر، وكل نقطة في أرض الوطن إحنا بنوصل ليها بالمشروع ده".
التعليقات